Kautamanipun Sedasa Dinten Awal Wulan Dzulhijah

 

Sekedap malih kita bade lumebet ing wulan Dzulhijah utawi Besar. Mangga kita songsong wulan menika kanthi ningkataken ibadah lan amal shalih, karana ing sedasa dinten awal mujudaken wekdal-wekdal ingkang minulya kados pangandikanipun Nabi ingkang artosipun :

”Ora ana dina kang sarupane amal shalih ing wektu iku luwih ditresnani dening Alloh tinimbang dina iki, yaiku : Sepuluh dina saka sasi Dzulhijah.” Wonten ingkang pitaken, ”Duh Rasululloh, Kalebet ugi jihad fi sabilillah? Panjenengane ngendika, ”Kalebu uga jihad fi sabilillah, kejaba wong kang jihad kanthi jiwa lan ragane banjur dheweke ora bali maneh (gugur)” Dipun riwayataken dening Imam Bukhari  saking Ibnu Abas ra.

Imam Ahmad, Rahimakumullah ngriwayataken saking Umar ra. Bilih Nabi saw ngendika, ”Ora ana dina kang luwih Agung lan luwih direnani dening Alloh kanggo laku kabecikan saliyane sepuluh dina (Dzulhijah ) iki. Mula padha akeh-akehna ing wektu iku tahlil, takbir lan tahmdi”.

 Amalan-amalan ingkang dipun syariataken ing 10 dinten awal dzulhijah :

(1). Nindakaken Ibadah Haji lan Umrah

Amal menika mujudaken amal ingkang langkung utami midherek hadits-hadits shahih ingkang nedahaken  kautamanipun, ing antawisipun sabda nabi saw :

”Saka Umrah tumeka Umrah mujudake tebusan (saka dosa-dosa kang ditindakake) ing antarane karone, lan Haji Mabrur piwalese ora liya Suwarga”.

 (2). Siyam ing dinten-dinten kasebat, utawi ing peranganipun, utamipun  ing dinten Arofah.

 Boten mamang malih bilih siyam mujudaken amalan ingkang langkung utami, ingkang kapilih Alloh  kagem Panjenenganipun Piyambak, kasebat ing hadits Qudsi ingkang artosipun :

”Puasa iki kanggo Ingsun, lan Ingsun kang bakal paring piwalese. Temen dheweke wus ninggalake syahwat, mangan lan ngombene mung kanggo Ingsun”

 

Dipun riwayataken saking Abu Said Al- Khudri rahu, Rasululloh saw ngendiaka, Sawenehing kawula ora puasa sedina ing dalane Alloh kejaba Alloh mesthi ngedohake dheweke kanthi puasane iku saka genine neraka suwene pitung puluh tahun.” (Hadits Muttafaq ’Alaih)

Dipun riwayataken dening Imam Muslim dari Abu Qotadah rah. Bilih Nabi saw ngendika ingkang artosipun :

”Puasa ing dina Arofah krana ngarep-arep ganjaran saka Alloh, bisa nglebur dosa-dosa setahun sadurunge lan sauwise.”

(3).Ngathahaken Takbir, Dzikir ing dinten-dinten kasebat

Kados firman Alloh SWT.

وَيَذْكُرُوا اسْمَ اللَّهِ فِي أَيَّامٍ مَعْلُومَاتٍ

”Lan dheweke padha nyebut Asmane Alloh ing dina-dina kang ditemtokake.”  (QS. Ql-Hajj : 28)

Para ahli tafsir nafsiraken  kanthi sedasa dinten awal Dzulhijah. Krana menika para ulama nganjuraken  supados ngathah-ngathahaken dzikir ing dinten-dinten kasebat, adhedhasar hadits saking Ibnu Umar ra. ingkang artosipun :

”Mula padha ngakeh-akehna ing dina-dina iku tahlil, takbir lan tahmid” (HR. Ahmad).

Lan dipun kengingaken dzikir ingkang gampil-gampil, kadosta takbir, tasbih, tahmid lan do’a-do’a ingkang dipun syariataken.

(4).Mertobat sarta nilarake sedaya lampah maksiat lan dosa

Ing pangangkah badhe nampi ampunan lan rahmat. Maksiat njalari katebihaken lan kasingkiraken kawula saking Alloh, Dene ketaatan saged njalari kacaket lan dipun tresnani dening Alloh.

Kasebat ing hadits saking Abu Hurairah rahu, bilih Rasululloh ngendika,

”Satemene Alloh iku cemburu, menawa sawenehing kawula nindakake prekara kang diharamake Alloh tumrap dheweke.” (Hadits Muttafaq ’Alaih)

 (5) Kathah amal shalih

Amal shalih ingkang awujud ibadah kados dene : shalat, sedekah, jihad, maos Al Qur’an, amar ma’ruf nahi munkar lan sanesipun, jalaran amal-amal kasebat ing dinten-dinten wau dipun tikelaken ganjaranipun. Malah amal ibadah ingkang boten utami menawi dipun tindakaken ing deinten kasebat badhe dados langkung utami lan dipun renani dening Alloh tinimbang amal ibadah ing dinten sanesipun sanadyan mujudaken amal ibadah ingkang utami, kalebet jihad ingkang mujudaken amal ibadah ingkang sanget utami, kejawi jihadipun tiyang ingkang boten wangsul bandha lan jiwanipun.

(6) Dipun Syariataken takbir Muthlaq

Inggih menika ing saben wekdal , siang utawi dalu dumugi shalat Ied. Ugi dipun syariataken takbir muqoyyad, inggih menika dipun tindakaken ing saben bibar shalat fardhu ingkang dipun tindakaken kanthi jama’ah. Tumrap sanesipun jama’ah haji  wiwit fajar ing dinten Arafah, lan tumrap jama’ah haji wiwit wekdal Dzuhur ing Dinten Qurban, dumugi Shalat Asar ing dinten Tasyriq.

(7).Nyembelih Qurban ing dinten Qurban lan dinten-dinten Tasyriq

Menika midherek Sunnah Nabi Ibrahim as. Rikala Allah Ta’ala nebus putranipun Isma’il kanthi sembelihan ingkang agung. Dipun riwayataken  bilih Nabi saw.  Qurban kanthi nyembelih domba jaler kalih pethak nggadhahi sungu. Panjenenganipun piyambak ingkang nyembeleh kanthi nyebat Asma Alloh lan takbir , lan matrapaken suku ing sisihing domba wau.” (Muttafaq ’Alaih)

(8). Kaawisan nyabut utawi motong kuku lan rambut tumrap shahibul qurban

Dipun riwayataken dening Imam Muslim lan sanesipun saking Ummu Salamah raha, bilih Nabi saw ngendika ingkang artosipun :

”Menawa sira meruhi Hilal sasi Dzulhijah, lan salah siji saka sira arep kurban becike dheweke nahan saka ngethok rambut lan kukune.”

Ing riwayat sanes , ”Mula dheweke aja njupuk perangane rambut utawa kukune tumekane dheweke kurban.

Ing QS  Al-Baqarah : 196 Alloh SWT  paring firman :

وَلا تَحْلِقُوا رُءُوسَكُمْ حَتَّى يَبْلُغَ الْهَدْيُ مَحِلَّهُ

”Lan sira aja nyukur sirahmu nganti tumeka papane khewan disembeleh”. (QS. A- Baqarah : 196)

Awisan wau namung khusus kangge tiyang ingkang badhe kurban, boten kalebet simah lan anak-anakipun, kejawi menawi kurban piyambak-piyambak.

Lan kenging mbayur sirah, utawi jungkatan sanadyan kepara saged  ngrontokaken, waton boten kajarag dipun cabut.(9).Nindakaken  Shalat Iedul Adha lan mirengaken Khutbahipun

Ing saben Muslim prayogi mangertosi hikmah dipun syariataken dinten riyadi menika. Dinten menika dinten syukur lan amal shalih. Pramila sampun ngantos dipun dadosaken dinten ingkang njalari supe dhumateng  Alloh, tebih saking rahmate Alloh, awrat nindakaken ibadah namung milih karemenan kadonyan.

(10). Ngisi Dinten-dinten kasebat kanthi nambahi ketaatan dhumateng Alloh

Ketaatan ingkang langkung ageng ingkang wajib kita ketingalaken inggih menika tauhid, raos kumawulanipun manungsa dhumateng Pangeranipun, kados dene kemaksiatan ingkang langkung ageng ingkang kedah kita singkiri  inggih menika syirik. Tauhid mujudaken tujuan dipun cipataken makhluk, supados kumawula, dhedhepe, manembah namung wonten ngarsanipun Alloh. Alloh paring firman :

وَمَا خَلَقْتُ الْجِنَّ وَالإنْسَ إِلا لِيَعْبُدُونِ

Lan Ingsun ora nyipta jin lan manungsa kejaba supaya dheweke padha manembah mung marang Ingsun. (QS. Adz Dzariyat : 56)