Panglipur Ingkang Ketaman Musibah

Ing kalodhangan menika badhe kaaturaken sawetawis pitutur saking ayat Quran Hadits saha fatwa para ulama, mugi sagedc dados panglipur kangge tiyang ingkang nembe ketaman musibah.

1.Musibah badhe karaos entheng kanthi ngengeti panandhang ingkang namani tiyang shalih. Rasulullah shallallahu ‘alaihi wa sallam paring sabda,

“Musibah kang namani ingsun temen bakal nglipur kaum muslimin.”[1] Shahih Al Jami’, 5459, saking Al Qosim bin Muhammad. Syaikh Al Albani ngendika hadits shahih. Ing lafazh sanes,.

مَنْ عَظَمَتْ مُصِيْبَتُهُ فَلْيَذْكُرْ مُصِيْبَتِي، فَإِنَّهَا سَتَهَوَّنُ عَلَيْهِ مُصِيْبَتُهُ

“Sapa wae kang krasa abot rikala ngadhepi musibah mula elinga musibah kang namani ingsun. Dheweke bakal ngrasakake entheng ngadhepi musibah iku.”[2] Kasebat ing Bahjatul Majalis wa Ansul Majalis, Ibnu ‘Abdil Barr, kc. 249,

Kanyata, musibah tiyang ingkang langkung shalih saking kita panci langkung awrat tinimbang ingkang kita alami. Pramila samesthinipun kita boten kalajeng-lajeng sedhih.

1.Saya mindhak kiyat imanipun, bzdhe saya dipun uji.. Saking  Mush’ab bin Sa’id -satunggiling tabi’in- saking bapakipun cariyos,

يَا رَسُولَ اللَّهِ أَىُّ النَّاسِ أَشَدُّ بَلاَءً

“Dhuh Rasulullah, manungsa pundi ingkang langkung awrat pacobanipun?”Rasulullah shallallahu ‘alaihi wa sallam paring sabda,

« الأَنْبِيَاءُ ثُمَّ الأَمْثَلُ فَالأَمْثَلُ فَيُبْتَلَى الرَّجُلُ عَلَى حَسَبِ دِينِهِ فَإِنْ كَانَ دِينُهُ صُلْبًا اشْتَدَّ بَلاَؤُهُ وَإِنْ كَانَ فِى دِينِهِ رِقَّةٌ ابْتُلِىَ عَلَى حَسَبِ دِينِهِ فَمَا يَبْرَحُ الْبَلاَءُ بِالْعَبْدِ حَتَّى يَتْرُكَهُ يَمْشِى عَلَى الأَرْضِ مَا عَلَيْهِ خَطِيئَةٌ »

“Para Nabi, banjur sapadhane lan sapadhane maneh. Saweneh wong bakal dicoba manut kahanan agamane. Menawa agamane kukuh, mula luwih abot maneh pacobane. Menawa agamane ringkih dheweke bakal dicoba manut bobot agamane. Sawenehing kawula bakal tansah nampa pacoban nganti dheweke lumaku ing lumahing bumi ing kahanan resik saka dosa.”[3] HR. Tirmidzi no. 2398, Ibnu Majah no. 4024, Ad Darimi no. 2783, Ahmad (1/185).

2. Ing sakwingkingipun musibah yemtu wonten margi ingkang gampil, Ing surat Alam Nasyroh, Allah Ta’ala paring firman,

فَإِنَّ مَعَ الْعُسْرِ يُسْرًا  , إِنَّ مَعَ الْعُسْرِ يُسْرًا

“Karana satemena sawuse rekasa iku ana kang gampang.” (QS. Alam Nasyroh: 5). Ayat menika dipun ambali malih.  “Satemena sawuse rekasa iku ana kang gampang.” (QS. Alam Nasyroh: 6)

Syaikh ‘Abdurrahman bin Nashir As Sa’di ngendika, “Tembung al ‘usr (rekasa) ngginakaken alif-lam lan nedahaken (istigroq) kangge sawernining rekasa. Menika nedahaken kados menapa rekaosipun, ing saben lampah rekaos temtu badhe manggih gampil.”[4] Taisir Karimir Rahman, Syaikh ‘Abdurrahman bin Nashir As Sa’di, hal. 929, Muassasah Ar Risalah, cetakan sepindhah, tahun 1423 H

Nabi shallallahu ‘alaihi wa sallam paring sabda,

وَأَنَّ مَعَ الْعُسْرِ يُسْراً

“Bebarengan rekasa iku ana kang gampang.”[5] HR. Ahmad no. 2804. Syaikh Syu’aib Al Arnauth ngendika hadits menika shahih.

Jamaah Jum’at rahimakumullah

3. Ngamalaken iman kanthi sabar ‘Ali bin Abi Tholib ngendika,

الصَّبْرُ مِنَ الإِيْمَانِ بِمَنْزِلَةِ الرَّأْسِ مِنَ الجَسَدِ، وَلَا إِيْمَانَ لِمَنْ لاَ صَبْرَ لَهُ.

“Sabar lan iman iku kaya dene sirah ing awake manunngsa. Mulane, ora iman (kanthi iman kang sampurna), menawa wong ora duwe sabar.”[6] Bahjatul Majalis wa Ansul Majalis, hal. 250.

4. Musibah kawitanipun karaos rekaos. Nanging menawi sabar badhe saya gampil. Hudzaifah ibnul Yaman ngendika.

إِنَّ اللهَ لَمْ يَخْلُقْ شَيْئاً  قَطٌّ إِلاَّ صَغِيْراً ثُمَّ يَكْبَرُ، إِلاَّ المصِيْبَة فَإِنَّهُ خَلَقَهَا كَبِيْرَةً ثُمَّ تَصْغُرُ.

“Satemene Allah ora nyipta samubarang kejaba saka kang cilik nganti gedhe kejaba musibah. Dene musibah Allah nyipta saka kahanan gedhe banjur bakal dadi cilik.”[7] Bahjatul Majalis wa Ansul Majalis, hal. 250.

Allah ing samukawis  kados ing ndalem nyipta manungsa  saking tataran alit ngantos dumugi diwasa (ageng) kados ing firmanipun,

هُوَ الَّذِي خَلَقَكُمْ مِنْ تُرَابٍ ثُمَّ مِنْ نُطْفَةٍ ثُمَّ مِنْ عَلَقَةٍ ثُمَّ يُخْرِجُكُمْ طِفْلًا ثُمَّ لِتَبْلُغُوا أَشُدَّكُمْ ثُمَّ لِتَكُونُوا شُيُوخًا

“Ya Panjenenngane kang nitahake sira saka lemah banjur saka setetes mani sawuse iku saka sagegem getih, banjur kalahirake sira minangka bocah, banjur (sira terus diuripake) supaya sira tumeka mangsa (diwasa) banjur (diparingi urip maneh) nganti tuwa.” (QS. Ghofir: 67)

Musibah dhatengipun ageng inggih karaos awrat. Nanging saya dangu saya keraos entheng menawi tiyang purun sabar.

5. Sabar ing awaling musibah. Rasulullah shallallahu ‘alaihi wa sallam paring sabda,

إِنَّمَا الصَّبْرُ عِنْدَ الصَّدْمَةِ الأُولَى

“Kang diarani sabar kudune diwiwiti rikala awal ketaman musibah.”[8] HR. Bukhari no. 1283, saking Anas bin Malik.

Menika sabar ingkang sakleresipun. Sabar ingkang sakleresipun sanes rikala sampun nggersula langkung rumiyin ing awaling musibah.

Jamaah Jum’at rahimakumullah

6. Ganjaran tiyang ingkang purun sabar tanpa winates. Kados janjinipun Allah,

إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ

“Satemene wong-wong kang sabar, ganjarane tanpa hisab (petungan).” (QS. Az Zumar: 10).

Ibnu Juraij ngendika bilih ganjaran kangge tiyang ingkang sabar boten saged kapetang babar pindhah, nanging piyambakipun badhe kaparingan tambahan saking menika. Maksudipun ganjaranipun boten winates.

Dene As Sudi ngendika bilih piwales tiyang ingkang sabar menika suwarga.[9]  Tafsir Al Qur’an Al ‘Azhim, Ibnu Katsir, 7/89,

7. Badhe nampi gantos ingkang langkung sae.

Ummu Salamah -salah setunggal garwa  Nabi shallallahu ‘alaihi wa sallam- ngendika nate mireng Rasulullah Saw paring sabda,

“Sapa wae saka kawula kang ketaman musibah bajur dhweke ngucapke: “Inna lillahi wa inna ilaihi rooji’un. Allahumma’jurnii fii mushibatii wa akhlif lii khoiron minhaa [Sedaya menika kagunganipun Allah, lan badhe wangsul dhumateng Panjenenganipun. Dhuh Allah, mugi Paduka paring ganjaran dhumateng musibah ingkang namani kula lan kaparingana gantos ingkang langkung sae]”, mula Allah bakal paring ganjaran marang musibahe lan paring ganti kang luwih becik.””[10]. HR. Muslim no. 918.

Do’a ingkang kasebataken ing hadits menika samesthinipun dipun ucapaken dening tiyang Muslim rkala piiyambakipun ketaman musibah, lan saktrepipun piyambakipun mangertosi. Insya Allah, pyambakipun badhe kaparingan gantos ingkang langkung sae.

Jamaah Jum’at rahimakumullah

Mekaten khutbah ingkang kaaturaken mugi ingkang sami nandhang musibah langkung entheng sangganipun, sarta tansah kaparingan sabar saking ngarsanipun Allah. Aamiin Yaa Rabbal ‘Aalamiin.

أَقُوْلُ قَوْلِيْ هَذَا وَأَسْتَغْفِرُ الله َلِيْ وَلَكُمْ وَلِجَمِيْعِ لْمُسْلِمِيْنَ مِنْ كُلِّ ذَنْبٍ , فَاسْتَغْفِرُوْهُ إِنَّهُ هُوَ الْغَفُوْرُ الرَّحِيْمُ

Editor/alih basa : KRT.H.Setyakusumaatmaja