Syahadat Mboten Namung Ing Lesan

Kados kita sedaya sampun sami uninga bilih rukun Islam ingkang sepisan inggih menika Sahadat Kalih. Inggih menika, Laa ilaaha illalloh Muhammadur Rasulullah. Rukun ingkang sepisan menika mujudaken tales utawi pundhasi tumrap rukun rukun sanesipun, lan sawernining hukum agami ugi kabangun ing sanginggiling rukun sepisan menika. Menawi tales menika kiat lan kukuh pramila sedaya amal sanesipun badhe leres, katampi ing ngarsanipun Alloh sarta mbekta manfa’at dhumateng ingkang nindakaken. Ananging menawi tales menika ringkih pramila amal-amal sanesipun badhe risak lan dados lebu ingkang kabur. Tiyang ingkang ngamalaken namung pikantuk sayah kesel lan gela, sarta kapitunan ing dinten kiamat.

Sahadat kalih menika nggadhahi utawi ngemu makna suraos lan tanggel-jawab. Tiyang ingkang ngucapaken kedah mangertos suraosipun lan nindakaken kanthi saleresipun jumbuh kaliyan suraosipun. Menawi boten, saestu ucapan wau boten wonten manfaatipun. Suraosipun Sahadat Laa ilaaha illalloh mujudaken pengakenan bilih boten wonten ingkang pantes dipun ibadahi kejawi Alloh. Lan sedaya sesembahan sanesipun Alloh, menika sesembahan ingkang batil.

Alloh SWT paring firman,

ذَلِكَ بِأَنَّ اللَّهَ هُوَالْحَقُّ وَأَنَّهُ يُحْيِي الْمَوْتَى وَأَنَّهُ عَلَى كُلِّ شَيْءٍقَدِيرٌ

 Kang mangkono iku jalaran satemene Alloh, Panjenengane kang Haq lan satemene panjenengane kang nguripake kabeh kang mati lan satemene Alloh Maha Kuwasa ing samubarang” (QS. Al Haj : 6)

 Dene sempurnanipun Sahadat Laa ilaaha illalloh menika ibadah dhumateng Alloh sawiji, lan boten manembah sanesipun. Pramila menika menawi kita ngucapaken Asyhadu an laa ilaaha illalloh, ateges kita nyatakaken nduwa saking sedaya sesembahan kejawi Alloh, lan istiqomah namung ngibadah dhumateng ngersanipun Alloh piyambak, sarta sagah netepi dhawuhipun lan nilaraken awisanipun. Pramila rikala Nabi saw dhakwah ing ngajengipun tiyang-tiyang musrik supados ngucapaken laa ilaaha illalloh piyambakipun sami mudheng bilih piyambakipun supados ngibadah namng dhumateng Alloh lan nilaraken nembah prahala. Krana menika piyambakipun boten purun ngucapaken. Piyambakipun mratelakaken kados ingkang Alloh firmanaken, ingkang artosipun ,

أَجَعَلَ الآلِهَةَ إِلَهًاوَاحِدًا إِنَّ هَذَا لَشَيْءٌ عُجَابٌ وَانْطَلَقَ الْمَلأمِنْهُمْ أَنِ امْشُوا وَاصْبِرُوا عَلَى آلِهَتِكُمْ إِنَّ هَذَا لَشَيْءٌيُرَادُ مَا سَمِعْنَا بِهَذَا فِيالْمِلَّةِ الآخِرَةِ إِنْ هَذَا إِلا اخْتِلاقٌ

 ”Ya gene panemune (Muhamad) Pangeran iku mung siji wae, perkara iki nggumunake banget. Panggedhene kafir banjur anglungani, pangucape, ”Ayo padha bubaran, kowe padha sumungkema marang brahala (sesembahanmu). Panemune Muhammad iki wis kersane Pangeran. Agama kang keri dhewe iki (agamane Isa) aku krungu yen mulangake kang kaya mangkono, ora liya goroh kang digawe-gawe.”(QS. Shad : 5-7)

 Menika maknanipun laa ilaaha illalloh, inggih menika ndadosaken sakathahing sesembahan dados setunggal lan nilaraken cara cara ibadah sanesipun dhumateng Alloh. Tiyang-tiyang musrik rikala semanten dhong sanget prekawis wau krana piyambakipun tiyang Arab ingkang estu-estu paham basa Arab, dene tiyang –tiyang ingkang sami sumungkem dhateng kuburipun para wali ing zaman samenika boten sami paham makna laa ilaaha illalloh, lan boten ngamalaken ingkang saleresipun. Pramila menika piyambakipun ngucapaken laa illaha illalloh nanging taksih kemawon manembah tiyang-tiyang ingkang sampun tilar.

Menawi mekaten tiyang-tiyang musrik zaman rumiyin langkung pinter tinimbang tiyang samenika ingkang ngaken muslim ing prekawis makna laa illaha illalloh lan amalanipun. Lajeng menapa makna lan manfa’atipun laa illaha illalloh tumrap piyambakipun menawi piyambakipun taksih kemawon undang-undang tiyang ingkang sampun pejah, nyuwun pambiyantu para wali kangge kasilipun hajat lan ngicalaken kesisahan, kanthi tawaf ing makam keramat lan nyembelih kurban kangge para wali.

Alloh SWT paring firman,

زُيِّنَ لَهُمْ سُوءُ أَعْمَالِهِمْ وَاللَّهُ لا يَهْدِي الْقَوْمَ الْكَافِرِينَ

 Dhewke dipaesi kanthi tindak tanduk kang ala. Dene Panjenengane Alloh iku ora kersa nedahake marang golongan kang padha kafir. (QS. At Taubah : 37)

Ing antawisipun pawujudan laa ilaaha illalloh inggih menika nindakaken shalat, mbayar zakat shiyam Ramadhan, haji menawi kuwawa, nindakaken wajib lan nilaraken pepacuh. Rumiyin para sahabat kapandhegani dening Abu Bakar merangi tiyang-tiyang ingkang boten purun mbayar zakat, mangka piyambakipun sami ngucapaken laa ilaaha illalloh. Para sahabat nelakaken, ” Satemene zakat mujudake hak lan kewajiban laa ilaaha illalloh.”

Wonten tiyang ingkang matur dhateng Hasan Al- Basri, ” Kathah tiyang ingkang sami nelakaken bilih sinten ingkang ngucapaken laa ilaaha illalloh mesthi mlebet suwarga. Panjenenganipun njawab, ” Sing bener sapa kang ngucap laa ilaaha illalloh banjur nindakake hak lan kewajibane laa illaha illalloh, mesthi lumebu suwarga.”

Satunggaling Tabi’in aran Wahab bin Munabih nate nampi pitaken, ”Leres ta yen laa ilaaha illalloh kuncine suwarga? Piyambakipun nerangaken, ”Pancen bener. Nanging kabeh kunci mesthi dhuweni untu. Menawa sira nggawa kunci kang mawa untu lawang bisa kabuka. Nanging yen ora ana untune, ya ora kena kanggo mbukak.”

Syirik ageng saged mbatalaken lan njugaraken laa illaha illalloh, dene sawernining lampah maksiat menika nyuda ganjaran laa ilaaha illalloh salaras kaliyan bobot dosa ingkang katindakaken. Satunggiling muslim wajib ngucapaken laa ilaaha illalloh mangertos maknanipun lan maujudaken hakipun lahir lan batin lan madhep mantep, istiqomah kaliyan laa ilaaha illalloh.

Alloh SWT paring firman,

وَلا يَمْلِكُ الَّذِينَ يَدْعُونَ مِنْ دُونِهِ الشَّفَاعَةَ إِلا مَنْ شَهِدَ بِالْحَقِّ وَهُمْ يَعْلَمُونَ

 ”Samubarang liyane Alloh kang padha disembah dening wong kafir ora duwe syafaat, ora wenang nyuwunake pikoleh tumrap liyane. Kejaba kang ngucap, ”Ora ana sesembahan kang bener kejaba mung Alloh” sarta nganggep lan meruhi surasane. (QS. Az Zukhruf : 86)

 Ingkang dipun kajengaken Al Haq ing ayat menika inggih laa ilaaha illalloh, dene ingkang dipun kajengaken meruhi, inggih menika manah mangertosi laa ilaaha illalloh ingkang dipun ucapaken dening lesan. Dados maksud saking laa ilaaha illalloh boten namung dumugi ucapan tanpa mudheng maknanipun, nanging yakin dhateng isi kandhunganipun lan ngamalaken saleresipun. Menawi namung dhawah ing ucapan, laa ilaaha illalloh boten piguna lan boten manfa’at.

Dene maknanipun Sahadat Muhammadur Rasululloh inggih menika pengakenan lan kapitadosan salebeting manah bilih Muhammad menika utusanipun Alloh. Lan kangge pamujudipun wonten sekawan margi :

Sepisan, nuhoni dhawuh Nabi, Kaping kalih pitados kabar utawi risalah ingkang dipun asta. Kaping tiga nebihi prekawis-prekawis ingkang dipun awisi. Lan kaping sekawan boten ngibadah dhumateng Alloh kejawi kanthi tuntunan ingkang sampun katetepaken dening panjenenganipun nabi..Pramila menawi kita anekseni bilih panjenenganipun minangka utusanipun Alloh, pramila kita wajib nuhoni dhawuh-dhawuhipun sarta nebihi awisan-awisanipun, pitados dhateng warta ingkang sampun dipun wedharaken sae prekawis Alloh utawi prekawis ingkang sampun dumados utawi ingkang badhe dumados sarta boten ngibadah ing ngarsanipun Alloh kejawi ingkang sampun dipun tuntunaken panjenenganipun.

Tegesipun kita tilaraken bid’ah lan sawernining pemanggih ingkang cengkah kaliyan sunnah, sepinten inggil ilmunipun tiyang ingkang ngandaraken.

Imam Muhammad bin Idris Asy Syafi’i nelakaken, ” Para ulama sarujuk sapa wae kang wus cetha ngadhepi sunnah Rasulululloh saw mula ora kena ninggalake mung karana kandhane sapa wae.

Ahmad bin Hambal nelakaken , ”Aku gumun marang wong-wong kang wus mangerti sanad lan sahih utawa orane hadits, nanging isih gelem manut panemune si Sufyan.

Editor/Alih Basa ; Mbah Djono